BUKURIA MËKATARE

Duke gjykuar thjesht,

siç thonë dhe librat fetarë,

se mëkaton edhe kur

dikush tjetër të pëlqen,

gratë dhe burrat dalin

të gjithë tradhtarë,

se rrallë gjen ndonjë

pa mëkatuar me mend.

 

Veçse nga ne burrat

kërkohet frenimi mizor,

as të mos imagjinojmë

femrën e bukur të tjetrit,

edhe kur na ndez stuhinë

brenda gjakut mashkullor,

edhe kur na troket takat

mbi damarët e nepsit.

 

Po kur ngacmimet e saj

na vijnë direkt në sy,

na bëjnë të marrim

malet çmendurisht,

të mëkatojmë padashur

me çdo virgjëreshë Mari,

që mund të ketë mbetur

pa u bërë nënë me Krisht.

 

Se ka femër që po të pa

dy herë me radhë në sy,

mund të verbohesh e të

godasësh me kokë murin.

Dhe po buzëqeshi ajo

për disa çaste me ty,

do të çmendesh patjetër,

se të ka hequr trurin.

 

Pastaj po të zhvishet

para teje krejt lakuriq,

duhet të hapet dheu

të rrokullisesh brenda.

Se edhe po të mbetesh

për disa kohë eksiq,

ke për të vdekur shpejt

nga dridhmat e rënda...

 

Ndaj ne i lutemi Zotit,

të mendohet pak më hollë,

kur sajon figura femre

me bukuri aq të rrallë,

ose të mos i lërë Evat

të na joshin me mollë,

ose të na stakojë sytë,

kur ato dalin përballë;